صاحبنا احمد اتولد في بيت كله قطط اتربى وكبر مع القطط والسبب حب والدته الكبير للقطط، رغم ان والده مكنش بيحبهم .
البيت مليان.. عشره او خمستاشر قطه على حسب . قطط تروح وقطط تيجي المهم ان البيت مفضيش من القطط لمدة ٣٠ سنه لحد ما صاحبنا كبر وخطب . اصرت خطيبته ليلى انه يتخلص من كل القطط لانهم هيتجوزوا في نفس البيت لان عندها فوبيا منهم .
وافق على مضض رغم زعل والدته ، الا قط واحد رفض رفض قاطع انه يمشيه ..القط ده كان اسمه فوفو وكان قط غريب .
تحبه من اول نظره .. تحس ان هو بيكلمك مش بينونو .. بيرحب بالضيوف على طريقته الخاصه بينط على كتف اي ضيف يدخل من الباب ويفضل يتمسح فيه .
كان زكي جدا لو الباب مقفول ينط على الاكره ويفتحها .. كان يدخل الحمام ويشد السيفون .. بيرفض ياكل على الارض لازم يقعد جانبهم وياكل في طبق مش على الارض .. لما كان يرجع من الشارع كان يقف على الباسطه ويرن الجرس او يخبط على الباب .
حتى في علاقته بالقطط الاناث كان مختلف برضوا .
وكانت امه بتقوله ان القط ده ملبوس او هو نفسه جن .. محدش عارف.. رغم ان لونه كان ابيض في اسود مش اسود خالص ..حتى قرايبهم وجيرانهم لاحظوا عليه نظراته وصوته اللي بيقدر يغيره حسب حالته لو كان غضبان او فرحان .. لما يبقى فرحان يقرب شفايفه من شفايفك كأنه بيبوسك .
القط فوفو كان حاسس ان ليلى مش بتحبة فكانت لما تيجي يبصلها بصات تخوفها وترعبها ويرفض يقعد جنبها .
في مره اكدت له امه ان القط ده بالليل اتحول لراجل وامه شافته في الضلمه ومن كتر الخضه مقدرتش تعمل حاجه .
القط كانت بتحبه الستات جدا اكتر من الرجاله لأسباب غامضة .. وكل البنات والستات كانوا بيجوا عشان يخلوا القط يقعد على حجرهم ويشيلوه ويلعبوا معاه .
الاسباب دي كانت قويه ان خطيبته تصر على ان القط ده لازم يمشي وحصل خلافات جامده جدا .
وفي يوم بالليل عرفت ليلى ان احمد مش موجود فجت البيت ومعاها قفص وقررت تاخد فوفو وترميه بعيد ..
سألت امه فين القط قالتلها نايم في اوضة احمد .. دخلت الاوضه بتفتح النور .. النور مش بينور .. حاولت تدوس على الزرار جامد وهي بتحاول الباب اتقفل عليها .
حاولت تفتحه معرفتش .. نادت على ام احمد محدش رد عليها .
فضلت تدور على فوفو في الضلمه لقيته نايم تحت السرير.. فوفو عينيه كانت منوره في الضلمه.. نورت كشاف وحاولت تناديه وهى مرعوبه .. كان معاها اكل عشان تغريه ..
ليلى استغربت ان القط محاولش يخربشها المره دي او ينفر في وشها .
فوفو قام بهدوء وخرج من تحت السرير فجأه النور نور وفوفو نط على كتفها وقعد يلحس فيها جامد واديه الاتنين حوالين رقبتها . النور فجأه طفى تاني .. ليلى حست بتقل شديد على جسمها ووقعت على الارض.
بعد شويه خرجت ليلى وهي حاسه احساس غريب وصممت المره دي ان فوفو لازم يقعد .
فين باقي القصة
ردحذفقصه قصيره مافيش باقي ليها
حذففين باقى القصة
ردحذفقصه قصيره ملهاش بلقي ممكن تزور صفحتنا هتلاقي روايات حلو💙
حذف