مكه: هو احنا ممكن نعمل فرحنا تاني؟؟؟
يوسف: ليه في فقره نسيتي تعمليها في فرحنا؟؟!
مكه: ما في ناس كتيير مشيره انها عملت فرحها تاني في عيد جوازهم
يوسف: ألاه....طب واحنا مالنا
احنا متجوزين من سنتين يا حبيبتي
مكه: ايه المشكله...نفرح تاني
يوسف: مش محتاجين نعمله
كل يوم معاكي فرح
مكه: لا مش هتثبت انا بالكلمتين دول
يوسف: فصلتيني
وترجعي تقولي انت مش رومانسي ليه ونينينيني
مكه: انت بتتريق عليا يا ابن ام يوسف
يوسف: هي دي بقت شتيمه ولا إيه؟؟!
وبعدين انا اقدر اتريق عليكي برضو يا كوكي
مكه: عاوزه شوكولاته وبيبسي
يوسف: علي فكره موضوع اننا لما نتتقاش في موضوع ف تقلبي عليا التربيزه وتطلبي حاجات ده هيخرب بيتي
مكه بهزر: يعني هو انت عندك حد اغلي مني تجبله يا چو
يوسف: لأ ياختي معنديش
مكه: اهو انت اللي فصلتني اهو..انزل هات بقا
يوسف: حاضر يا اخره صبري
______________________
يوسف: فرده الشراب الاسود فين؟
مكه: انا لو اعرف كنت حطتيتها مع اختها
يوسف: ايه الرد الغريب ده
مش المفروض تقولي هدورلك عليها وكده!!
مكه: بص يا يوسف انا لما باجي اغسل
بحط الشربات مع بعض كويس؟؟؟
يوسف: كويس، وبعدين؟
مكه: لما باجي احطهم في الدولاب بقا بلاقيها فرده واحده معرفش ازاي
يوسف: ياااااسبحان الله
الغساله بتاكل الشربات وبتطلعهم سناجل
مكه: اهو انت قولت بنفسك انها بتطلعهم سناجل... العيب في غسالتك يابيه
يوسف: هو ده الجواز اللي قاللولي عليه!!!
المفروض انك هتدلعيني ومش هتخليني محتاج حاجه كل طلباتي مجابه
مكه: طب ما هما قالولي برضو انك هتخرجني وتعاملني زي الاميره كده وهزار طول اليوم وده محصلش وانا ساكته اهو
يوسف: مالك يا حبيبتي رافعه حاجبك وبتبرقي كده ليه!!!؟؟
انتي هتتحولي ولا ايه
مكه: فين مخدات الريش اللي هنضرب بيها بعض هااااا
فين اني اصحي اشوفك واقف في المطبخ بتحضر الفطار كده منغير اسطوانه كل يوم
مترد يا استاذ
يوسف: ايوه صح انا غلطان
هجبلك مخدات ريش حاضر
ابعد يا شيطان اهدي يا حبيبتي احنا بنتناقش
مكه: ايوه صح احنا بنتكلم عادي وانا مش عاوزه انكد عليك يعنى
يوسف: نكد!!!! مين قال نكد
لا انتي مش بتنكدي خالص
احنا نقفل الموضوع لحد ما اجي من برا
سلام
~~~~~~~~~~~~~~~~~~~~
يوسف: مكه يا مكه انا جعان
مكه بتوتر: جعان يعني المفروض تاكل دلوقتي صح
يوسف: اومال هاكل بكرا
عملتي غدا ايه
مكه: كانت مكرونه بشاميل
يوسف: طيب جمي.....
يعني ايه كانت؟؟؟؟؟
مكه: يعني كانت مكرونه بشاميل دي كانت نيتي يعني
يوسف: نيتك!!!!
اومال طلعت ايه
مكه: طعم غريب كده
ناقص بشاميل وملح...ناقص كل حاجه تقريبا
يوسف: يابنتي حد قالك اني فار تجارب
انتي بتتعلمي فيا الاكل ...ما تعملي حاجه عارفها وخلاص
مكه: الله يعني اجرب في مين يا يوسف
ده انت جوزي والمفروض تشجعني علشان اكون شاطره وكده
يوسف: طيب هاتي اللي المفروض اسمها مكرونه بشاميل دي هاكلها
مكه بفرحه: هو ده قره عيني
يوسف: يلا كلي
مكه: والله ما حد هيدوقها قبلك ياراجل
بدء ياكل وعمل نفس تعابير وش عادل إمام في فيلم تجربه دينماركيه
يوسف: بصي انا هبقا اشجعك في اكله تانيه بس بلاش ديه وانبي
تيجي نطلب بيتزا؟؟؟؟؟؟
مكه: ايوه انت صح بلا تجربه جديده بلا تشجيع احنا نطلب بيتزا بدل ما نعمل غسيل معده
____________________________
مكه: طنط سميره ايه المفاجأة الحلوه دي
اميره: طب وبالنسبه ليا مفاجأة مش حلوه ولا إيه؟؟
مكه: لأ ازاي نورتونا طبعا اتفضلو
سميره: يوسف موجود ولا لسه مجاش
يوسف: نورتي يا ست الكل
سميره: جاي بدري من الشغل انهارده ليه انت تعبان؟؟؟
يوسف: لا يا أمي مش تعبان ولا حاجه
انا واخد انهارده اجازه
أميره: عامل ايه يا چو
مكه: هجبلكم عصير واجي
اميره دي بنت خالته وانا مش بطاقيها ومش بحب اسلوبها مع يوسف من فتره الخطوبه اصلا....مامته بتعاملني عادي بس بحس انها عاوزه تتضايقني بكلامها بس باخد الموضوع بهزار علشان معملش مشاكل
وبرضو هي امه وليه حق تخاف علي ابنها
اميرة شافت شنطه دليفيري ف حبت ترخم شويه:
اي ده هو انت كل أكلك من برا ولا إيه
شكل مكه مبتعرفش تعمل اكل
يوسف: مين قال كده؟؟
دي انا بحب أكل مكه جدا وهي شاطره في كل حاجه بصراحه
بس ساعات بحب اريحها ونطلب اكل من برا
فرحت اوي انه جه في صفي حتي وانا عارفه ان مش دي الحقيقه
سميره: حتي لو اكلها حلو
مش هيكون احلي من ميرو...دي بتعمل الاكل بنفس واصفاتي
يوسف بهزر: مفيش حد زيك يا ست الكل
بس مكه بتعمله بكل حب ف اكيد بيكون مختلف
انا مش محتاجه ارد او اغيظها كافيه رده مفرحني بصراحه
وكل يوم بيأكدلي اني اختارت صح
هما مشيو ويوسف نزل يوصلهم
يوسف: اعمليلى فنجان قهوه يا كوكي
مكه بهدوء: حاضر
هو استغرب هدوئها لأنه متعود تقوله لا انت بتعملها احلي اعملي معاك كمان
يوسف: مالك يا حبيبتي
مكه: انت ممكن تندم انك اتجوزتني!!!!
يوسف بأهتمام: لأ طبعاً
ليه بتقولي كده؟
مكه: مش بعرف اعمل اكل
هدومك ساعات بتبوظ بسببي
بطلب منك تقعد معايا كتير
يوسف: هي دي اسباب أصلا؟؟
هو انا متجوزك علشان تعملي اكل وتروقي وتغسلي وخلاص؟؟
مكه بزعل: بنت خالتك شاطره وبتعرف تعمل كل حاجه ومامتك بتحبها
يوسف: بس انا بحبك انتي
يعني ايه الفايده اني اتجوز واحده بتعرف تعمل كل حاجه بس مش بحبها؟؟
مكه: يعني مش هتقارني بالبنات إللي في عيلتك؟؟!
يوسف: انا نطقها قبل كده؟
مكه:لأ
يوسف: محدش زيك اصلا علشان اقارنك بيه....انتي تتقارني بنجمه او قمر في الليل منور سماه ضوء أول النهار، وبرضو تكسبي
"يغمُر قَلبي بحنانِه كأنه يقول إن لا يوجد سواكِ هُنا❤.
النهايه
تعليقات
إرسال تعليق